امت نیوز ڈیسک //
کپواڑہ:سرحدی ضلع کپواڑہ کے ہندواڑہ علاقہ میں پولیس نے ایک عسکریت پسند معاون کو گرفتار کرنے کا دعوی کیا ہے۔ گرفتار عسکریت پسند معاون کا تعلق عسکریت پسند تنظیم لشکر طیبہ سے بتایا جارہا ہے۔ پولیس کے ایک ترجمان نے بتایا کہ ہندوارہ پولیس اور فوج کی 15 آر آر کی ایک مشترکہ ٹیم نے گنائی محلہ پازل پورہ ماگام میں معمول کی چیکنگ کے دوران ایک شخص کو روکا۔انہوں نے کہا کہ گرچہ اس شخص نے سکیورٹی فورسز کو دیکھتے ہی فرار ہونے کی کوشش کی تاہم اس کو دھیر لیا گیا۔
بیان میں کہا گیا کہ تلاشی کے دوران اس شخص کی تحویل سے ایک گرینیڈ اور کچھ قابل اعتراض مواد بر آمد کیا گیا۔بیان میں گرفتار شدہ کی شناخت خورشید احمد بٹ ولد گلزار احمد بٹ ساکن امر گڑھ تارتھ پورہ کے بطور کی گئی ہے۔ پولیس بیان میں کہا گیا کہ ابتدائی پوچھ تاچھ سے معلوم ہوا کہ وہ کالعدم جنگجو تنظیم جیش محمد سے وابستہ جنگجو اعانت کار ہے۔ انہوں نے کہاکہ اس سلسلے میں پولیس اسٹیشن ہند وارہ میں متعلقہ دفعات کے تحت ایک کیس درج کرکے مزید تحقیقات شروع کی گئی ہیں۔
واضح رہے کہ سکیورٹی فورسز نے سوپور علاقہ میں بدھ کے روز ایک عسکریت پسند معاون کو گرفتار کرنے کا دعوی کیا ہے۔ پولیس کے مطابق عسکریت پسند معاون جیش محمد تنظیم کے ساتھ وابستہ ہے۔گرفتار عسکریت پسند معاون کی شناخت فاروق احمد وانی ولد عبدالرشید وانی ساکن واگب ہاییگام کے طور پر ہوئی ہے۔
