امت نیوز ڈیسک //
میر واعظ کشمیر مولوی عمر فاروق آج ٹھیک چار سال بعد تاریخی جامعہ مسجد سرینگر میں خطاب کرنے والے ہیں۔کیونکہ میر واعظ عمر فاروق کو جامع مسجد سرینگر میں نماز جمعہ ادا کرنے کی اجازت دینے کا امکان ہے۔
مقامی نیوز ایجنسی کے این ایس کے مطابق انجمن اوقاف جامع مسجد نے بتایا کہ سینئر پولیس حکام نے کل میرواعظ کی رہائش گاہ کا دورہ کرکے انہیں بتایا کہ حکام نے انہیں گھر کی نظربندی سے رہا کرنے اور آج جمعہ کی نماز کے لیے جامع مسجد جانے کی اجازت دینے کا فیصلہ کیا ہے۔
انجمن اوقاف نے بتایا کہ "ہمیں حکام کی طرف سے بتایا گیا ہے کہ میر واعظ عمر فاروق کو آج تاریخی جامع مسجد میں نماز جمعہ ادا کرنے کی اجازت دی جائے گی، اس لیے ہمیں تیار رہنے کے لیے کہا گیا ہے۔”
یہ فیصلہ ایسا موقع پر لیا گیا ہے جب میر واعظ عمر فاروق کی اگست 2019 سے گھر میں نظربندی کے حوالے سے دائر درخواست پر15 ستمبر کو جموں و کشمیر ہائی کورٹ نے حکومت سے جواب طلب کیا تھا۔
واضح رہے میرواعظ اگست 2019 سے گھر میں نظربند ہیں اور تب سے انہیں جامع مسجد سری نگر میں جمعہ کی نماز ادا کرنے کی اجازت نہیں دی گئی ہے۔ عوامی ایکشن کمیٹی، انجمن اوقاف جامع مسجد اور دیگر سیاسی جماعتوں کی جانب سے میر واعظ کی رہائی کا لمبے عرصے سے مطالبہ کیا جا رہا ہے۔
