اننت ناگ میں دم گھنٹے سے مقامی مزدور کی موت

امت نیوز ڈیسک//
اننت ناگ:جنوبی کشمیر کے ضلع اننت ناگ کے بجبہاڑہ علاقے میں پیر کی صبح ایک غیر مقامی مزدور کی کرائے کے مکان میں دم گھٹنے سے موت واقع ہوئی ہے۔ پولیس ذرائع نے بتایا کہ ریاست اتر پردیش کا رہنے والا ایک باشندہ جس کی شناخت محمد شہباز ولد محمد یوسف کے طور پر ہوئی ہے، کی موت ضلع اننت ناگ کے ٹاک محلہ، بجبہاڑہ میں دم گھٹنے سے ہوئی ہے۔

اننت ناگ پولیس کا کہنا ہے کہ اطلاع موصول ہوتے ہی پولیس کی ٹیم ٹاک محلہ پہنچی، جہاں شہباز کرائے کے کمرے میں رہ رہا تھا اور اس کی لاش اپنی تحویل میں لیکر طبی و قانونی کارروائی کے لئے ایس ڈی ایچ بجبہاڑہ منتقل کیا گیا۔ پولیس ذرائع کا کہنا ہے کہ طبی و قانونی لوازمات کو انجام دینے کے بعد ہی میت کو آخری رسومات کی انجام دہی کے لیے لواحقین کے سپرد کر دیا جائے گا۔ اس حوالہ سے پولیس نے بھی مقدمہ درج کرکے مزید تحقیقات شروع کر دی ہے۔

واضح رہے کہ سردیوں کے ایام میں لوگ سردیوں سے بچنے کے لئے مختلف آلات کا استعمال کرتے ہیں جن میں گیس، کیروسین یا کوئلے پر چلنے والے گرمی کے مختلف آلات شامل ہیں جبکہ اسکے علاوہ برقی رو سے چلنے والے ہیٹر وغیر بھی استعمال میں لائے جاتے ہیں۔ بعض اوقات ان آلات سے خارج ہونے والے گیس، دھوئیں اور کمرے میں وینٹی لیشن نہ ہونے کے سبب کمرے میں آکسیجن کی مقدار کم جاتی ہے اور نیند میں ہی کمرے میں موجود شخص کی موت واقع ہو جاتی ہے۔ اس طرح کی مختلف واردات میں وادی کشمیر میں اب تک کئی افراد فوت ہو چکے ہیں جن میں مقامی و غیر مقامی باشندے بھی شامل ہیں۔”