(کولگام) ضلع کولگام میں عسکریت پسندوں کے ذریعہ ایک سرپنچ کو گولی مار کر ہلاک کرنے کے ایک دن بعد، آئی جی پی کشمیر وجے کمار نے ہفتہ کو کولگام ضلع میں سیکورٹی کا تفصیلی جائزہ لیا۔اعلیٰ پولیس افسر نے ڈی آئی جی پولیس اور ڈی آئی جی سی آر پی ایف اننت ناگ کے ساتھ کولگام کا دورہ کیا اور ڈی سی کولگام، ایس ایس پی کولگام، کولگام میں سی آر پی ایف کے تمام سی اوز اور دیگر پولیس افسران سے ملاقات کی۔ایک پولیس افسر نے بتایا، "پنچایتی راج اداروں اور محفوظ افراد کا تفصیلی سیکورٹی جائزہ لیا گیا،” انہوں نے مزید کہا، "ان کے دوروں کی نگرانی کے لیے نئے اقدام پر بھی تبادلہ خیال کیا گیا۔” افسر نے مزید کہا کہ اس کے علاوہ عسکریت پسندی کے خلاف کارروائیوں کو بڑھانے اور عسکریت پسندوں کے رینک میں نئی بھرتیوں کو کم کرنے کے لیے مخصوص ان پٹ پیدا کرنے پر توجہ دی گئی. آئی جی پی وجے کمار نے سیکورٹی جائزے کے دوران کہا کہ پنچ اور سرپنچ جنگجوؤں کے لئے آسان ٹارگیٹ ہیں۔انہوں نے کہا کہ جن پنچوں اور سرپنچوں کو زیادہ خطرات لاحق ہیں ان کو سرینگر اور ضلع صدر مقامات پر محفوظ رہائش گاہیں فراہم کی گئی ہیں.
