آسمان ابر آلود رہنے کے بیچ وادی کے کئی علاقوں میں رم جم بارشیں

(سرینگر) وادی کشمیر میں چلہ کلان کی شدید ترین سردی کی لہر کے بیچ اتوار کو دن بھر موسم ابر آلود رہنے کے بیچ رم جم بارشیں ہوئی۔ ادھر محکمہ موسمیات نے آئندہ 24گھنٹوں کے دوران پیر پنچال کے آر پار برفباری ہونے کے امکانات ظاہر کرتے ہوئے 28دسمبر کے بعد دوپہر تک موسم خراب رہنے کی پیشگوئی کی ہے۔ سردی کی شدید لہر کے بعد اونی لباس اور گرم ملبوسات کی طلب بڑھ گئی ہے۔ شدید ترین سردی کی وجہ سے مارکیٹوں اور بازاروں میں شہری آگ جلا کر سردی کے اثرات کو کم کرنے میں مصروف نظر آتے ہیں۔ سردی بڑھتے ہی گیس اور لکڑی کی قیمتوں میں بھی اضافہ ہوگیا ہے۔ محکمہ موسمیات کے مطابق  اگلے 24 گھنٹوں میں پیر پنچال رینج اور جنوبی کشمیر میں ہلکی سے درمیانی درجے کی برفباری ہو سکتی ہے جبکہ 28دسمبر کے بعد دوپہر تک موسمی صورتحال خراب رہ سکتی ہے۔ ادھر شہر سرینگر سمیت وادی بھر میں سخت ترین ٹھنڈ جاری رہی اور دن کے وقت بھی لوگوں کو آنے جانے میں سخت پریشانیوں کا سامنا کرنا پڑا جبکہ رات کے وقت سردی کی شدت میں اضافہ ہونے کے بعد لوگ اضافی بسترے، کمبل، گرم ملبوسات اور روم ہیٹر و واٹر بوتل جیسی چیزیں خریدنے پر مجبور ہورہے ہیں۔