(جموں) جموں و کشمیر پولیس کے ڈائریکٹر جنرل دلباغ سنگھ نے جمعہ کے روز ایک پریس کانفرنس کے دوران نامہ نگاروں سے بات چیت کرتے ہوئے کہا کہ حیدر پورہ انکاونٹر کی تحقیقات منصفانہ ہے اور جو سیاسی لیڈر فورسز کو دی گئی کلین چٹ پر سوال اٹھا رہے ہیں انہیں تحقیقاتی پینل کو ثبوت پیش کرنے چاہئیں۔ اُنہوں نے مزید کہا، ”ہم نے واضح کر دیا ہے کہ حیدر پورہ آپریشن درست تھا۔ اگر ان کے پاس ثبوت ہیں تو وہ تحقیقاتی پینلز کے سامنے پیش کریں۔ دلباغ سنگھ نے مزید کہا کہ ہمیں ایسے الفاظ سے تکلیف ہوتی ہے۔ پولیس سربراہ نے یہ بھی کہا کہ سیاسی رہنماوں کے تبصرے غیر قانونی ہیں اور قانون اس معاملے میں اپنا راستہ اختیار کرے گا۔ دریں اثنا دلباغ سنگھ نے کہا کہ 2021 میں جموں و کشمیر میں 100 کامیاب کارروائیوں میں 44 سرکردہ عسکریت پسندوں سمیت کل 182 عسکریت پسند مارے گئے۔ انہوں نے یہ بھی کہا کہ اس سال جموں و کشمیر میں 134 نوجوان عسکریت پسندی کی صفوں میں شامل ہوئے، جن میں سے 72 ہلاک اور 22 گرفتار ہوئے۔ اس سال دراندازی میں کمی آئی، صرف 34 عسکریت پسند دراندازی کرنے میں کامیاب ہوئے۔ انہوں نے مزید کہا کہ اس کے علاوہ پانتھہ چوک میں ایک پولیس بس پر حملے میں ملوث جیشِ محمد کے نو عسکریت پسندوں کو گزشتہ 24 گھنٹوں میں مارا گیا۔
