(رام بن) سرینگر جموں قومی شاہراہ پر رام بن کے کئی مقامات پر پسیوں اور پتھروں کے گرنے اور بانہال سیکٹر میں بھاری برفباری کی وجہ سے ٹریفک کی آمدورفت اتوار کے روز بھی مکمل طور پر بند ہے۔ اتوار کو پنتھیال کے مقام پر پتھر گرنے اور مروگ میں بھاری پسیاں گرآئیں جس کے بعد ہائی وے اتھارٹی کی جانب سے پسیاں ہٹانے کا کام جاری کیا گیا ہے۔ اس دوران فورلین ٹنل سے بانہال اور بانہال سے شیر بی بی تک شاہراہ سے برف ہٹانے کیلئے تعمیراتی کمپنیوں کی مشینری کام پر لگی ہوئی ہے تاہم مسلسل برفباری کی وجہ سے سڑک کی بحالی کا کام متاثر ہے۔ حکام کے مطابق کرول، مہاڑ، کیفٹیئریا موڑ، ماروگ، خونی نالہ، سیتا رام پسی سمیت ایک آدھ درجن سے زائید مقامات پسیوں اور پتھروں کی زد میں ہیں جبکہ رامسو اور بانہال کے درمیان مسلسل برفباری کی وجہ سے راستہ کو بند کرنا پڑا۔
