(سرینگر) انڈین آرمی کی پندرہویں کور کے جنرل آفیسر کمانڈنگ لیفٹیننٹ جنرل ڈی پی پانڈے نے اتوار کو گور و گوبند سنگھ جی جینتی کے موقع پر رعناواری میں واقع گردوارا چھٹی پادشاہی میں حاضری دی۔ 
اس موقع پر انہوں نے کہا کہ میں نے کشمیر میں موجود ہر مذہبی مقام پر حاضری دی ہے اور آج میں یہاں حاضر ہوا۔ لیفٹینٹ جنرل پانڈے نے کہا کہ میرا وادی خاص کر سرینگر کے نوجوانوں کے نام یہ پیغام ہے کہ وہ برسہا برس پرا نے بیانیے کو بدل کر امن اور ترقی کے بیانیے کو اختیار کریں تاکہ لوگوں کے چہرے خوشیوں سے کھل اٹھیں۔ انہوں نے کہا کہ میں نے یہاں گردوارے پر بھی کشمیر کے امن وترقی کے لئے دعا کی۔ ان کا کہنا تھا کہ آرمی بھاری برف باری کے بیچ لوگوں کے لئے بچائو آپریشنز چلا رہی ہے۔ ان کا مزید کہنا تھا کہ لوگوں کی خدمت کرنے کا جذبہ ہماری فوج کے خون میں شامل ہے۔۔
