بڈگام کے سویہ بگ اور شیخ پورہ میں مکمل لاک ڈاؤن کا حکم

(بڈگام) ضلع بڈگام میں کورونا کیسز کی تعداد میں مسلسل اضافے کو دیکھتے ہوئے ڈسٹرکٹ مجسٹریٹ بڈگام نے ضلع کے دو گاؤں میں مکمل لاک ڈاون کا حکم دیا ہے۔ ڈسٹرکٹ مجسٹریٹ شہباز احمد مرزا نے ایک حکم نامہ جاری کیا ہے، جس میں ڈسٹرکٹ مجسٹریٹ نے اپنے اختیارات کا استعمال زیر سیکشن 144 آف سی آر پی سی اور سیکشن 30 آف نیشنل ڈیزاسٹر منیجمنٹ ایکٹ 2005 کے تحت گاؤں سویہ بگ اور شیخ پورہ میں ہر قسم کی نقل و حمل پر مکمل پابندی عائد کردی ہے اور یہ پابندی اگلے 10 دنوں تک جاری رہے گی جو آج سے شروع ہو چکی ہے۔ واضح رہے کہ بڈگام ضلع میں گزشتہ کچھ روز سے کووڈ-19 مثبت کیسز میں مسلسل اضافہ ہو رہا ہے۔ ضلع میں کورونا کے 159 مثبت کیسز سامنے آئے ہیں اور اس طرح ضلع میں اس وقت کل 465 ایکٹیو مثبت کیسز ہیں۔