(سرینگر) دو سال بعد کشمیری عازمین کا پہلا قافلہ بالآخر اتوار کو یہاں سے عمرہ پر روانہ ہوگیا ہے۔ اگرچہ اومیکرون کے خطرے کی وجہ سے بکنگ میں نمایاں کمی واقع ہوئی تھی، لیکن 43 عازمین کا ایک گروپ سعودی عرب میں زیارت کعبہ اور عمرہ کی ادائیگی کے لیے روانہ ہوا۔ اطلاعات کے مطابق وادی سے عمرہ پر جانے کیلئے ایک قافلہ سفر پر روانہ ہوا ہے، دو سال بعد یہ پیشرفت ہوئی ہے۔ البتہ واضح رہے کہ فی الحال تقریباً 100 عازمین عمرہ کے ہفتہ وار بنیادوں پر سفر پر جانے کی امید ہے۔ وادی میں مقیم آپریٹرز امید کر رہے ہیں کہ کووڈ کا خطرہ کم ہونے کے بعد یہ تعداد بڑھ جائے گی۔ جموں کشمیر ایسوسی ایشن آف حج عمرہ کمپنیوں (جے کے اے ایچ یو سی) کے جنرل سیکرٹری محمد یونس نے بتایا ہے کہ کشمیر وادی سے عمرہ مارچ 2020 میں کورونا وائرس وبائی امراض پھیلنے کے بعد معطل کردیا گیا تھا۔ گزشتہ ماہ، مملکت سعودی عرب نے بھارت، انڈونیشیا، پاکستان، مصر سمیت چھ ممالک کے لائسنس یافتہ اور تسلیم شدہ ٹور آپریٹرز کو عمرہ ویزہ جاری کرنے اور اس کے مطابق پیکجز ڈیزائن کرنے کی اجازت دی۔
