(جموں) حد بندی کمیشن، جسے جموں و کشمیر میں اسمبلی اور پارلیمانی حلقوں کی حد بندیوں کو دوبارہ ترتیب دینے کا کام سونپا گیا ہے، نے پیر کے روز عوام اور سول سوسائٹی کے ساتھ حد بندی مسودے پر تجاویز اور اعتراضات حاصل کرنے کے لیے اپنی دو روزہ طویل میٹنگوں کا آغاز کیا۔ یونین ٹیریٹری کے لیے تجویز کمیشن نے 14 مارچ کو اپنی رپورٹ پبلک ڈومین میں ڈالی اور لوگوں سے اعتراضات اور تجاویز طلب کی ہیں۔ حکام نے بتایا کہ کمیشن نے یہاں کنونشن سینٹر میں جموں کے تمام اضلاع کے عوام، سول سوسائٹی اور سیاسی جماعتوں کے ارکان کے ساتھ میٹنگیں کیں، جبکہ اسی طرح کی ایک عوامی نشست سرینگر کے ایس کے آئی سی سی میں منگل کو منعقد کی جائے گی۔عہدیداروں نے بتایا کہ کمیشن نے رام بن، راجوری، پونچھ، کشتواڑ، کٹھوعہ اور ڈوڈہ اضلاع سے ایسے 20 وفود اور عوامی نمائندوں سے ملاقات کی ، انہیں سنا اور ان کی آراحاصل کی ہے عوامی اراکین اور منتخب نمائندوں نے اسمبلیوں کے نئے حلقے بنانے کے حوالے سے مختلف مطالبات اٹھائے اور اس مسودے پر اعتراضات بھی اٹھائے جس میں مختلف علاقوں کو اسمبلی اور پارلیمانی حلقوں کے دیگر علاقوں کے ساتھ ملا یا گیا ہے۔کٹھوعہ، ادھم پور، ڈوڈہ، رام بن، کشتواڑ، راجوری اور پونچھ اضلاع کے لوگوں نے صبح 10 بجے سے عوامی نشستوں میں حصہ لیا جبکہ ریاسی، سانبہ اور جموں کے لوگوں نے دوپہر 2.00 بجے سے کنونشن سینٹر میں ہونے والے دوسرے اجلاس میں شرکت کی، جو شام تک جاری رہی۔ عہدیدار نے بتایا کہ سرینگر، بڈگام، اننت ناگ، کولگام، پلوامہ اور شوپیاں کے لوگ 5 اپریل کو ایس کے آئی سی سی میں پہلے حصے میں ہونے والی عوامی نشستوں کا حصہ ہوں گے جبکہ گاندربل، بانڈی پورہ، کپواڑہ اور بارہمولہ کے لوگ دوسرے حصے کے اجلاس میں شرکت کریں گے۔حد بندی کمیشن، جس میں جسٹس (ریٹائرڈ) رنجنا پرکاش دیسائی بطور چیئرپرسن، چیف الیکشن کمشنر سشیل چندرا اور ریاستی الیکشن کمشنر (ایس ای سی) کے کے شرما اس کے ارکان کے طور پر شامل ہیں. واضح رہے 6 مارچ 2020 کو ایک سال کی مدت کے ساتھ یہ کمیشن قائم کیا گیا تھا۔ تاہم، COVID-19 وبائی امراض کے تناظر میں، اس کی مدت 6 مارچ 2021 کو ایک سال کے لیے بڑھا دی گئی۔ نیشنل کانفرنس کے تین لوک سبھا ممبران (فاروق عبداللہ، حسنین مسعودی اور محمد اکبر لون)، بی جے پی ایم پی جگل کشور اور مرکزی وزیر جتیندر سنگھ اس کے پانچ ایسوسی ایٹ ممبران بھی ہیں۔مسودہ تجویز کے مطابق جموں و کشمیر میں لوک سبھا کی نشستوں کی تعداد میں کوئی اضافہ نہیں کیا گیا ہے۔اسی طرح، یونین ٹیریٹری کی پارلیمانی نشستوں میں درج فہرست ذاتوں (SCs) اور درج فہرست قبائل (STs) کے لیے کوئی ریزرویشن نہیں ہے۔جموں ڈویژن میں جموں-ریاسی اور ادھم پور-ڈوڈہ حلقے ہوں گے جبکہ کشمیر ڈویژن میں سری نگر-بڈگام اور بارہمولہ-کپواڑہ ہوں گے۔ ڈرافٹ میں کہا گیا ہے کہ اننت ناگ-پونچھ سیٹ دونوں ڈویژنوں کا حصہ ہوگی۔تین رکنی کمیشن نے مجوزہ 90 رکنی ایوان میں جموں خطے میں مزید چھ نشستیں اور کشمیر میں صرف ایک اضافی نشست کی تجویز پیش کی ہے۔رپورٹ میں کہا گیا ہے کہ کشمیر میں اسمبلی کی 47 اور جموں کے علاقے میں 43 نشستیں ہوں گی۔
