(پونچھ) 86کلو میٹر طویل تاریخی مغل شاہراہ کو زائد از تین ماہ بعد بدھ کے روز ٹریفک کی نقل و حمل کے لئے کھول دیا گیا ہے۔ یاد رہے اس تاریخی روڈ کو بھاری برف باری کے بعد ماہ جنوری میں ٹریفک کی نقل و حمل کے لئے بند کر دیا گیا تھا۔ ڈپٹی ایس پی ٹریفک پونچھ آفتاب حسین نے کہا کہ شاہراہ کو گاڑیوں کی آمد ورفت کیلئے کھول دیا گیا ہے، آج تقریباً 40 چھوٹی مسافر و مال برداروں کو پونچھ سے وادی کی طرف جانے کی اجازت دی گئی ہے۔ میکانکل انجینئرنگ محکمے نے بتایا کہ گرچہ اس روڈ پر گذشتہ ماہ شروع ہونے والابرف ہٹانے کا کام دو ہفتے قبل ہی مکمل ہوچکا ہے لیکن ٹریفک کی نقل وحمل کو ابھی اجازت نہیں تھی۔ واضح رہے کہ اس روڈ کو کھولنے کے لئے حال ہی میں لوگوں نے احتجاج بھی درج کیا تھا۔ دریں اثنا صوبائی کمشنر جموں ڈاکٹر راگو لنگرنے لوگوں سے اپیل کی ہے کہ وہ محکمہ ٹریفک کی طرف سے وقت وقت پر جاری کی جانے والی ٹریفک ایڈوائزریز پر عمل کریں تاکہ اس سڑک پر ٹریفک کی نقل و حمل کو یقینی بنایا جا سکے۔
