کولگام// سیکورٹی فورسز نے ہفتے کے روز کولگام کے یاری پورہ بستی کے مشی پورہ-کجر علاقے میں پانچ دنوں کے بعد آپریشن کو ختم کر دیا۔
حکام نے بتایا کہ خراب موسم کی وجہ سے آپریشن کو روک دیا گیا ہے۔
نیوز ایجنسی کشمیر نیوز آبزرور نے ایک اہلکار کے حوالے سے بتایا کہ جمعرات کو حزب کے دو مقامی عسکریت پسندوں کی ہلاکت کے بعد تلاشی کے دوران عسکریت پسندوں سے کوئی نیا رابطہ قائم نہیں ہوا۔
انہوں نے بتایا کہ موسم کی خرابی کی وجہ سے آپریشن روک دیا گیا ہے۔
تفصیلات کے مطابق عسکریت پسندوں کی موجودگی سے متعلق مخصوص اطلاعات کے بعد 14 جون کو علاقے میں آپریشن شروع کیا گیا تھا۔
حکام نے بتایا کہ 14 جون کو ابتدائی فائرنگ کے تبادلے کے بعد علاقے میں تلاشی کا سلسلہ جاری رہا اور 16 جون کو عسکریت پسندوں کے ساتھ تازہ رابطہ قائم ہوا۔
اُنہوں نے بتایا کہ16 جون کو، پولیس نے دعویٰ کیا کہ تصادم کے دوران دو جنگجو مارے گئے اور ایک مارے گئے جنگجو کی شناخت کولگام کے موہن پورہ کے زبیر صوفی کے طور پر کی گئی۔ انہوں نے بتایا کہ دوسرے جنگجو کی شناخت ابھی تک معلوم نہیں ہو سکی ہے۔
انہوں نے مزید کہا کہ صوفی 31 مئی کو خاتون ٹیچر رجنی بالا کے قتل میں ملوث تھا۔
ان کا مزید کہنا تھا کہ علاقے میں مزید دو دن تک تلاشی کا سلسلہ جاری رہا تاہم کوئی نیا رابطہ قائم نہیں ہوا اور بالآخر خراب موسم کی وجہ سے 5 دن بعد آپریشن ہفتے کی شام کو ختم کر دیا گیا.
