پونچھ: سرحدی ضلع پونچھ کے جولاس فائرنگ رینج میں بدھ کے روز ہوئے ایک حادثاتی دھماکے میں دو فوجی اہلکار شدید طور سے زخمی ہو گئے۔ جنہیں علاج کے لیے پونچھ کے فوجی اسپتال لے گئے, جہاں دوران علاج ایک فوجی کی موت واقع ہوگئی۔ سرکاری ذرائع کے مطابق یہ واقعہ اُس وقت پیش آیا جب پونچھ کے جولاس فائرنگ رینج میں فورسز اہلکار ٹریننگ میں مصروف تھے۔
حادثاتی دھماکے میں زخمی دو فوجی اہلکاروں میں سے ایک ہلاک ہونے والے فوجی کی شناخت رشی کیش ولد راجیش دوبے ساکن سہارنپور اترپردیش کے طور ہوئی ہے، جس کا پوسٹ مارٹم ڈسٹرکٹ اسپتال پونچھ میں کیا گیا، وہیں زخمی کانسٹیبل مکیش کمار کی نازک حالت کو دیکھتے ہوئے انہیں مناسب علاج کے لیے دیر شام ہیلی کاپٹر کے ذریعہ ملٹری اسپتال ادھم پور منتقل کر دیا گیا۔
