امت نیوز ڈیسک //
ایشیا کپ 2022 میں بھارت کے خلاف میچ سے قبل پاکستانی ٹیم کو بڑا جھٹکا لگا ہے۔ ٹیم کے فاسٹ باؤلر محمد وسیم جونیئر ٹورنامنٹ سے باہر ہو گئے ہیں ۔ پاکستان کرکٹ بورڈ نے ایک بیان جاری کرتے ہوئے اس کی اطلاع دی ہے۔ وسیم سے پہلے شاہین آفریدی کو بھی ٹورنامنٹ سے باہر ہونا پڑا۔
بیان میں کہا گیا ہے کہ ‘وہ بدھ کو پاکستانی ٹیم کے پریکٹس سیشن کے دوران باؤلنگ کرتے ہوئے انجری کا شکار ہوئے’۔ محمد وسیم جونیئر کا ٹیم کے طبی عملے نے جائزہ لیا اور پھر ان کا ایم آر آئی سکین ہوا۔ میڈیکل ٹیم وسیم کی بحالی پر گہری نظر رکھے گی اور انگلینڈ کے دورہ پاکستان سے قبل ان کی مسابقتی کرکٹ میں واپسی کا از سر نو جائزہ لیا جائے گا۔
بیان کے مطابق، فاسٹ بولر حسن علی کو وسیم کی جگہ ٹیم میں شامل کیا گیا ہے۔ حسن علی گزشتہ تین ہفتوں سے نیشنل ہائی پرفارمنس سینٹر میں اپنی باؤلنگ پر کام کر رہے ہیں اور اس وقت راولپنڈی میں ہیں.
