سرینگر///وزیر دفاع نے مقامی سطح پر دفاعی مصنوعات کی تیاری کےلئے تیسری فہرست جاری کرتے ہوئے کہا ہے کہ بھارت دفاعی صلاحیت کومزید بڑھانے کےلئے اب درآمدات پر کم ہی انحصار کرے گا۔ وزیر دفاع نے کہا ہے کہ اب اس فہرست میں شامل جنگی سامان جو کہ فوج کو درکار ہے مقامی سطح پر تیار کیا جائے گا اور فہرست میں شامل مذکورہ اشیاءمقررہ مدت کے اندر ہندوستانی صنعت سے خریدا جائے گا۔ دفاعی شعبے میں خود انحصاری کے خواب کو پورا کرنے کے لیے مسلسل قدم اٹھا رہی حکومت نے اتوار کو 780 مزید ایسی مصنوعات اور آلات کی تیسری فہرست جاری کی ہے جو درآمد نہیں کیے جائیں گے اس فہرست کو جاری کرتے ہوئے وزیر دفاع راج ناتھ سنگھ نے کہا کہ اس سے دفاعی پبلک سیکٹرکے اداروں کی طرف سے کی جانے والی درآمدات میں کمی آئے گی اس فہرست کو ایک مقررہ وقت کے ساتھ منظور کیا گیا ہے جس میں کہا گیا ہے کہ مقررہ مدت کے بعد یہ مصنوعات صرف گھریلو صنعت سے خریدی جائیں گی۔ اس کی تفصیلات وزارت دفاع کی متعلقہ ویب سائٹ پر دی گئی ہیں۔ فہرست میں مذکور مقررہ مدت کے بعد ہی انہیں ہندوستانی صنعت سے خریدا جائے گا۔وزارت دفاع اس سے قبل بھی ایسی ہی دو فہرستیں جاری کر چکی ہے جس میں 458 آلات کوملک میں ہی بنانے اور تیار کرنے کی بات کہی گئی ہے۔ پہلی فہرست کے تحت جاری کردہ 167 مصنوعات کو دیسی کیاجاچکا ہےاور اب ان کی درآمدات نہیں ہوگی۔ان مصنوعات کو ‘میک’ زمرے کے تحت مقامی بنانا ہوگا۔ ‘میک’ زمرہ کا مقصد ہندوستانی صنعت کی زیادہ سے زیادہ شرکت کے ساتھ خود انحصاری حاصل کرنا ہے۔ صنعت کے ذریعہ آلات، سسٹمز، بڑے پلیٹ فارمز کے ڈیزائن اورترقی یاان کے اپ گریڈیشن سے متعلق منصوبے اس زمرے کے تحت شروع کئے جاسکتے ہیں۔
