سرینگر: نیشنل کانفرنس کے سابق رکن راجیہ سبھا غلام نبی وانی (رتنپوری) پیر کو سابق کانگریس لیڈر غلام نبی آزاد کی نئی تشکیل دی جانے والے پارٹی میں شامل ہوئے۔
غلام نبی وانی نیشنل کانفرنس کی جانب سے سنہ 2008 تا 2012 تک راجیہ سبھا ممبر تھے تاہم مرحوم سید علی گیلانی اور شیخ عبداللہ پر متنازعہ بیان دینے کے بعد نیشنل کانفرنس نے اُن سے دوری بنائی رکھی۔
غلام نبی وانی گزشتہ برسوں سے سیاست سے کنارہ کشی کر چکے تھے لیکن ذرائع کے مطابق انہوں نے گزشتہ دنوں سے غلام نبی آزاد سے رابطہ قائم کرکے آج انکی حمایت کی۔ وانی ضلع پلوامہ کے رتنی پورہ گاؤں سے تعلق رکھتے ہیں تاہم کئی برسوں سے وہ سرینگر میں مقیم ہے۔
قابل ذکر ہے کہ جموں و کشمیر کے سابق وزیر اعلیٰ غلام نبی آزاد نے قریب نصف صدی تک کانگریس کے ساتھ جڑے رہنے کے بعد گزشتہ ہفتے استعفیٰ دیکر اپنی علیحدہ سیاسی جماعت تشکیل دینے کا اعلان کیا۔ جموں و کشمیر کانگریس کے سینئر لیڈران سمیت دیگر سیاسی جماعتوں سے تعلق رکھنے والے لیڈران و کارکنان آزاد کے ساتھ ہاتھ ملا رہے ہیں۔
