امت نیوز ڈیسک //
کپوارہ:جموں و کشمیر پولیس نے کپوارہ میں لائن آف کنٹرول کے قریب ٹیکری نار علاقے میں دو عسکریت پسندوں کو مارنے کا دعوی کیا ہے۔ پولیس نے کہا کہ دونوں عسکریت پسندوں کی شناخت ابھی باقی ہے، جبکہ ہلاک شدہ عسکریت پسندوں کے قبضے سے اسلحہ و گولہ بارود ضبط کیا گیا ہے۔
تفصیلات کے مطابق بھارت۔پاکستان کے مابین جاری جنگ بندی کے درمیان جموں و کشمیر پولیس نے آج مچل کپواڑہ ضلع کے ٹیکری نار میں لائن آف کنٹرول کے قریب ایک تصادم میں دو عسکریت پسندوں کو مارنے کا دعویٰ کیا ہے۔ پولیس نے بتایا کہ مارے گئے عسکریت پسندوں کی شناخت کا پتہ لگایا جا رہا ہے جبکہ جاں بحق ہونے والوں کے پاس سے اسلحہ بھی برآمد ہوا ہے۔کشمیر زون پولیس نے ٹویٹ کیا کہ ‘فوج اور کپواڑہ پولیس نے کپواڑہ کے مچل علاقے میں ٹیکری نار میں ایل او سی کے قریب عسکریت پسندوں کو زیر کر دیا۔ مارے گئے عسکریت پسندوں کی شناخت کی جا رہی ہے۔ ان کے قبضے سے 2 اے کے 47 رائفلز، 2 پستول اور 4 دستی بم برآمد ہوئے۔
پولیس مزید تحقیقات کر رہی ہے۔
