امت نیوز ڈیسک //
جموں و کشمیر پولیس نے اونتی پورہ میں ایک بلڈنگ کو منسلک کیا ہے۔ تفصیلات کے مطابق پولیس نے آج چک اونتی پورہ میں ترال نودل سڑک پر چک کے مقام پر دو منزلہ بلڈنگ کو اٹیچ کیا۔ اس بلڈنگ میں کئی کمروں کے علاوہ ایک بیکری شاپ موجود ہے۔ اونتی پورہ پولیس اسٹیشن کی ایک ٹیم نے آج ایس ڈی پی او ممتاز علی بھٹی کی قیادت میں اس بلڈنگ پر ایک بورڈ چسپان کر کے بلڈنگ کو آٹیچ کیا ہے۔ نوٹس بورڈ میں لکھا گیا ہے کہ یہ بلڈنگ ملک مخالف سرگرمیوں کے لیے استعمال میں لائی گئی ہے اور پہلے ہی ایف آئی آر زیر نمبر 108/2022 کے تحت مختلف دفعات کے تحت اس حوالے سے کیس درج کیا گیا تھا اور دوران تفتیش اب اس بلڈنگ کو اٹیچ کیا جاتا ہے اور بنا سرکاری اجازت کے اس میں کوئی کام نہیں کیا جائے گا۔ یاد رہے اس بلڈنگ میں 2022 کے دوران ایک انکاؤنٹر بھی ہوا تھا۔ چند روز قبل اونتی پورہ میں ایس آئی اے نے ایک اور بلڈنگ کو اٹیچ کیا تھا، مذکورہ بلڈنگ جماعت اسلامی کی پراپرٹی تھی۔ ادھر آج صبح پہلگام کے لیور علاقے میں بھی حکام نے سرگرم عسکریت پسند محمد عامر خان کے صحن کی دیوار کو منہدم کر دیا۔
