وادی میں ہلکی بارشوں کا سلسلہ پھر شروع

امت نیوز ڈیسک//
سری نگر:محکمہ موسمیات کی پیش گوئی کے عین مطابق وادی کشمیر میں رک رک کر ہلکی بارشوں کا سلسلہ جاری رہنے کے بیچ شبانہ درجہ حرارت میں اضافہ درج ہوا ہے۔متعلقہ محکمے کے ایک ترجمان نے بتایا کہ وادی میں اگلے چوبیس گھنٹوں کے دوران گرج چمک کے ساتھ مزید ہلکی بارشیں متوقع ہیں۔
انہوں نے کہا کہ وادی میں بعد ازاں 5 سے 10 مئی تک موسم مجموعی طور پر خشک رہنے کا امکان ہے تاہم اس دوران بعد از دوپہر گرج چمک کے ساتھ ہلکی بوندا باندی کو خارج از امکان قرار نہیں دیا جاسکتا ہے۔
ان کا کہنا ہے کہ بعد میں 11 سے 13 مئی تک موسم عام طور پر ابر آلود رہنے کے ساتھ پہاڑی علاقوں میں کہیں کہیں ہلکی برف باری یا بارشیں جبکہ میدانی علاقوں میں گرج چمک کے ساتھ ہلکی بارشوں کا امکان ہے۔
محکمے نے کسانوں سے کہا ہے کہ وہ پانچ مئی کے بعد اپنے کھیت کھلیانوں میں آپریشنز شروع کر سکتے ہیں۔
دریں اثنا وادی میں گلمرگ کو چھوڑ کر شبانہ درجہ حرارت میں اضافہ درج ہوا ہے۔
گرمائی دارلحکومت سری نگر میں کم سے کم درجہ حرارت11.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت7.8 ڈگری سینٹی گریڈ ریکارڈ ہوا تھا۔
وادی کے شہرہ آفاق سیاحتی مقام گلمرگ میں کم سے کم درجہ حرارت3.5 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت 4.0 ڈگری سینٹی گریڈ ریکارڈ ہوا تھا۔
وادی کے دوسرے مشہور سیاحتی مقام پہلگام میں کم سے کم درجہ حرارت6.1 ڈگری سینٹی گرید ریکارڈ کیا گیا جہاں گذشتہ شب کا درجہ حرارت1.7 ڈگری سینٹی گریڈ ریکارڈ ہوا تھا۔
سرحدی ضلع کپوارہ میں کم سے کم درجہ حرارت9.4 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت4.8 ڈگری سینٹی گریڈ ریکارڈ ہوا تھا۔
گیٹ وے آف کشمیر کے نام سے مشہور قصبہ قاضی گنڈ میں کم سے کم درجہ حرارت 10.0 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت6.2 ڈگری سینٹی گریڈ ریکارڈ ہوا تھا۔