امت نیوز ڈیسک //
سری نگر، 19 نومبر : وزیر سکینہ اِیتو نے بدھ کے روز کہا کہ سرد موسم کے پیش نظر جماعت اول سے لے کر مڈل کلاسز تک کے طلبہ کے لیے سرمائی تعطیلات ممکنہ طور پر دسمبر کے پہلے ہفتے سے شروع ہوں گی۔
نیوز ایجنسی کشمیر نیوز آبزرور کے مطابق نامہ نگاروں سے بات کرتے ہوئے وزیر نے کہا کہ والدین بار بار سرمائی تعطیلات کے شیڈول کے متعلق درخواست کرتے ہیں۔
انہوں نے کہا: “سردیوں کا موسم چھوٹے بچوں کے لیے کافی مشکل ہوتا ہے۔“
سکینہ اِتو نے مزید کہا، “ہم اس حوالے سے پہلے ہی ایک میٹنگ کر چکے ہیں اور ابتدائی طور پر یہ فیصلہ کیا گیا ہے کہ جماعت اول سے مڈل تک کے طلبہ کی چھٹیاں دسمبر کے پہلے ہفتے سے ہوں گی۔“
نصابی کتابوں کے مسئلے پر بات کرتے ہوئے، وزیر نے کہا: “ہم نے اس معاملے کو بڑی حد تک درست کر لیا ہے۔“
انہوں نے مزید کہا کہ “کتابوں اور یونیفارم کی کمی نہ ہو، اس کے لیے واضح ہدایات جاری کی گئی ہیں۔“
وزیر اِتو کا کہنا تھا کہ نجی اسکولوں کی جانب سے سرکاری اصولوں کی خلاف ورزی پر سخت کارروائی کے لیے جے کے بوس کے سیکریٹری، چیئرمین، ایجوکیشن سیکریٹری اور دیگر متعلقہ حکام کو ہدایات دی گئی ہیں۔
انہوں نے کہا: “کسی بھی نجی اسکول کے خلاف کتابوں یا فیس سے متعلق شکایت موصول ہوئی تو ہم یقینی طور پر سخت کارروائی کریں گے۔“
