امت نیوز ڈیسک //
سرینگر، 19 اپریل : حکومت نے کشمیر بھر کے کوچنگ سینٹروں کے لیے سخت قواعد و ضوابط جاری کرتے ہوئے ان اداروں پر نگرانی مزید سخت کر دی ہے۔ نئے احکامات کے تحت تمام کوچنگ مراکز کو فیس ڈھانچے کی تفصیلی معلومات ظاہر کرنا، اساتذہ کی اہلیت شائع کرنا، حفاظتی اسناد حاصل کرنا اور متعدد لازمی سہولیات فراہم کرنا ضروری قرار دیا گیا ہے۔
تعلیم محکمہ کے ذرائع نے کشمیر نیوز ٹرسٹ کو بتایا کہ ہر کوچنگ سینٹر کو کلاس وار اور مضمون وار فیس اسٹرکچر کو عوامی کرنا ہوگا، جبکہ اساتذہ کی تعلیمی اور پیشہ ورانہ اہلیت بھی وادی کے معروف اخبارات میں شائع کرنے کی ہدایت دی گئی ہے۔ حکام کے مطابق اس اقدام کا مقصد طلبہ اور والدین کے لیے شفافیت بڑھانا ہے۔
ہر کوچنگ سینٹر کو عمارت کی حفاظتی رپورٹ اور فائر سیفٹی سرٹیفکیٹ کے علاوہ مالک یا پروپرائٹر کے پولیس کردار و سابقہ ریکارڈ سرٹیفکیٹ بھی جمع کرانے ہوں گے۔ اسی کے ساتھ فرسٹ کلاس جوڈیشل مجسٹریٹ سے تصدیق شدہ حلف نامہ بھی لازمی ہے، جس میں اس بات کی توثیق ہو کہ کسی بھی سرکاری ملازم کو تدریسی عملے کے طور پر تعینات نہیں کیا گیا ہے۔
مزید ہدایات میں کہا گیا ہے کہ کوچنگ مراکز میں مکمل بجلی کا انتظام، مناسب ہواداری، اور ہر کلاس میں روشن روشنی کا انتظام ہونا چاہیے۔ پینے کے صاف پانی کی فراہمی، ضرورت کی جگہوں پر سی سی ٹی وی نگرانی، اور مطلوبہ سیکورٹی اقدامات کو یقینی بنانا لازم ہوگا۔ طلبہ کی شکایات کے ازالے کے لیے شکایت بکس یا رجسٹر رکھنا بھی لازمی قرار دیا گیا ہے۔
اس کے علاوہ اداروں کو لڑکوں اور لڑکیوں کے لیے الگ بیت الخلاء کا انتظام کرنا ہوگا، جبکہ بی پی ایل، یتیم یا بے سہارا طلبہ کے لیے کم از کم 10 فیصد نشستیں مختص کرنا بھی لازمی قرار دیا گیا ہے۔(کے این ٹی)
—
