امت نیوز ڈیسک //
پیر کے روز وزیر اعلیٰ عمر عبداللہ کی صدارت میں جموں میں کابینہ کا اجلاس منعقد ہوا، جس میں متعدد اہم انتظامی اور ترقیاتی امور پر تفصیلی غور و خوض کیا گیا۔
ذرائع کے مطابق اجلاس میں جاری ترقیاتی منصوبوں کا جائزہ لیا گیا اور طرزِ حکمرانی اور عوامی فلاح و بہبود سے متعلق وقت مقررہ کے تحت پیش کی گئی تجاویز پر تبادلۂ خیال کیا گیا۔
سرکاری ذرائع نے بتایا کہ اجلاس کے دوران مختلف محکموں میں جاری بڑے منصوبوں کی پیش رفت کا جائزہ لیا گیا اور تاخیر کا شکار اسکیموں کو تیز رفتاری سے مکمل کرنے کے لیے اقدامات پر غور کیا گیا۔ اس کے علاوہ یونین ٹیریٹری کے مختلف اضلاع میں مجوزہ آئندہ اقدامات کے لیے درکار انتظامی منظوریوں پر بھی بحث ہوئی۔
اجلاس میں وزراء نے وزیر اعلیٰ کو اپنے اپنے محکموں کی کارکردگی، درپیش چیلنجز اور جاری پروگراموں کے تحت حاصل شدہ پیش رفت سے آگاہ کیا۔ کابینہ کے تبادلۂ خیال کا محور عوامی خدمات کی بہتر فراہمی، ادارہ جاتی نظام کو مضبوط بنانے اور ترقیاتی عمل کو مزید مؤثر بنانے پر مرکوز رہا۔
