امت نیوز ڈیسک //
بارہمولہ، 8 جنوری: شمالی کشمیر کے ضلع بارہمولہ میں شدید سرد موسم کے دوران ایک افسوسناک واقعہ پیش آیا، جہاں بھارتی فوج سے وابستہ دو پورٹرز اپر گلمرگ کے قریب ایک نالے میں پھسل کر گر گئے۔
سرکاری ذرائع کے مطابق یہ واقعہ اُس وقت پیش آیا جب دونوں پورٹرز انیتا پوسٹ کی جانب جا رہے تھے، جو علاقے میں شدید برف باری کے باعث موسمِ سرما میں کٹ آف رہتی ہے۔ برف سے ڈھکی اور پھسلن والی زمین پر چلتے ہوئے دونوں کا توازن بگڑ گیا اور وہ نالے میں جا گرے۔
متاثرہ پورٹرز کی شناخت لیاقت احمد دیدار (27) ولد غلام محمد دیدار، ساکن مسجد آگان چنڈوسہ، اور اشفاق احمد کھٹانہ (33) ولد جمال الدین کھٹانہ، ساکن پچار چنڈوسہ، ضلع بارہمولہ کے طور پر کی گئی ہے۔
واقعے کے فوراً بعد ریسکیو ٹیموں کو جائے وقوعہ کی طرف روانہ کیا گیا۔ حکام کا کہنا ہے کہ شدید موسم، گہری برف اور دشوار گزار راستوں کے باوجود ریسکیو آپریشن جاری ہے۔
ریسکیو کارروائی کے دوران مزید تفصیلات کا انتظار ہے۔
