امت نیوز ڈیسک //
بارہمولہ، 9 جنوری : شمالی کشمیر کے ضلع بارہمولہ کے اپر گلمرگ علاقے میں پیش آئے ایک افسوسناک واقعے میں فوج کے دونوں پورٹر، جو پھسل کر ایک نالہ میں گر گئے تھے، مردہ حالت میں برآمد کر لیے گئے ہیں۔ حکام نے جمعہ کے روز اس کی تصدیق کی۔
حکام کے مطابق یہ واقعہ جمعرات کی شام اُس وقت پیش آیا جب دونوں پورٹر انیتا پوسٹ کی جانب جا رہے تھے، جو شدید برف باری کے باعث موسمِ سرما میں منقطع رہتی ہے۔ برف سے ڈھکے اور انتہائی پھسلن والے راستے پر چلتے ہوئے دونوں کا توازن بگڑ گیا اور وہ نالہ میں جا گرے۔
واقعے کے فوراً بعد ریسکیو ٹیموں کو حرکت میں لایا گیا اور سخت موسمی حالات، گہری برف اور دشوار گزار علاقے کے باوجود تلاشی مہم شروع کی گئی۔ مسلسل کوششوں کے بعد دونوں کی لاشیں برآمد کر لی گئیں۔
جاں بحق ہونے والوں کی شناخت لیاقت احمد دیدڑ(27) ولد غلام محمد دیدڑ ساکن مسجد آگان چندوسہ اور اشفاق احمد کھٹانہ (33) ولد جمال الدین کھٹانہ ساکن پچہاڑ چندوسہ، ضلع بارہمولہ کے طور پر ہوئی ہے۔
حکام کا کہنا ہے کہ واقعے سے متعلق تمام قانونی اور رسمی کارروائیاں ضابطے کے مطابق مکمل کی جا رہی ہیں۔[کے این ٹی]
