امت نیوز ڈیسک //
سرینگر، 13 جنوری: سال 2024 میں پیش آئے گنڈبل کشتی حادثے کے ایک متاثرہ شخص شوکت احمد شیخ کی لاش پیر کے روز دریائے جہلم سے برآمد کر لی گئی، جس کے ساتھ ہی طویل عرصے سے جاری تلاش آپریشن اختتام پذیر ہو گیا، مقامی لوگوں نے بتایا۔
مقامی باشندوں نے خبر رساں ایجنسی کشمیر نیوز آبزرور (کے این او) کو بتایا کہ مذکورہ شخص حادثے کے بعد سے لاپتہ تھا اور اس کی لاش آج حادثے کے مقام کے قریب دریائے جہلم کے ایک حصے سے نکال لی گئی۔
اس سے قبل میرین کمانڈوز (مارکوس) کے ماہر غوطہ خوروں نے اسٹیٹ ڈیزاسٹر ریسپانس فورس (ایس ڈی آر ایف) کی کوئیک رسپانس ٹیم کے تعاون سے پانی کے اندر وسیع پیمانے پر تلاشیاں انجام دی تھیں، تاہم ان کارروائیوں کے دوران لاش برآمد نہیں ہو سکی تھی۔
بالآخر پیر کے روز مقامی لوگوں نے حادثے کے مقام کے نزدیک دریائے جہلم سے لاش نکال لی۔
واضح رہے کہ گندبل کشتی حادثہ، جس میں بچوں سمیت آٹھ افراد جاں بحق ہوئے تھے، سرینگر کی حالیہ تاریخ کے ہولناک ترین واقعات میں سے ایک سمجھا جاتا ہے۔
