(جموں) کئی سالوں بعد جموں و کشمیر میں سرگرم عسکریت پسندوں کی تعداد 2سو سے کم رہنے کو ایک بڑی کامیابی سے تعبیر کرتے ہوئے آرمی کی شمالی کمان کے سربراہ لیفٹنٹ جنرل وائی کے جوشی نے کہا کہ آرمی کی مدد کیلئے جدید ترین ٹیکنالوجی کو فوج میں شامل کیا جا رہا ہے۔ انہوں نے مزید کہا کہ گزشتہ ایک سال سے لائن آف کنٹرول پر جنگ بندی کی وجہ سے سرحدی علاقوں میں رہنے والے لوگوں کے روزمرہ کے معمولات اور طرز زندگی میں نمایاں بہتری آئی ہے تاہم اب بھی عسکریت پسندوں کی دراندازی کی کوشش جاری ہے جن کو ہر سطح پر ناکام بنایا جا رہا ہے ۔ ادھم پورہ میں آرمی کے ناردرن کمانڈ ہیڈ کوارٹر میں منعقدہ ایک تقریب کے بعد میڈیا سے بات کرتے ہوئے شمالی کمان کے سربراہ لیفٹنٹ جنرل وائی کے جوشی نے کہا کہ کئی سالوں کے بعد جموں و کشمیر میں عسکریت پسندوں کی تعداد 200 سے کم ہے جو ایک قابل ذکر کامیابی ہے جو کہ عوام کیلئے خوشی کی بات ہے اور آرمی سمیت تمام فورسز کیلئے فخر کی بات ہے۔انہوں نے کہا کہ آرمی کی مدد کیلئے جدید ترین ٹیکنالوجی کو فوج میں شامل کیا جا رہا ہے۔ شمالی کمانڈ کے سربراہ نے کہا کہ ہر سال کی طرح گزشتہ سال بھی ناردرن کمانڈ کیلئے قابل ذکر سال تھاجس میں آرمی نے ہر چیلنج کا مقابلہ کرتے ہوئے دشمنوں کے ناپاک عزائم کو ناکام بنایا۔ جموں و کشمیر اور لداخ کے مرکز کے زیر انتظام علاقے کی اسٹریٹجک اہمیت کو ہر کوئی جانتا ہے اور آرمی نے اس علاقے کی حفاظت کیلئے اپنی ذمہ داری بخوبی نبھائی ہے۔ شمالی کمان نے بھی بین الاقوامی سرحد پر مکمل کنٹرول رکھتے ہوئے ایل اے سی، ایل او سی ٹی، اے جی ڈی ایل کی سات داخلی سکیورٹی پر سخت کنٹرول رکھا ہے۔انہوں نے مزید کہا کہ مشرقی لداخ میں فوجیوں نے چین کے پی ایل اے کے ساتھ بہت سے علاقوں سے علیحدگی کو مثبت انداز میں انجام دیا ہے۔ دیگر علاقوں سے بھی علیحدگی کیلئے پی ایل اے کے ساتھ بات چیت جاری ہے۔ اس کے ساتھ ساتھ ان برفانی چوٹیوں پر آرمی نے چوکس رکھا ہوا ہے اور یہ بہادری، شجاعت اور عزم کی زندہ مثال ہے۔ انہوں نے کہا کہ گزشتہ ایک سال سے لائن آف کنٹرول پر جنگ بندی کی وجہ سے سرحدی علاقوں میں رہنے والے لوگوں کے روزمرہ کے معمولات اور طرز زندگی میں نمایاں بہتری آئی ہے۔ تاہم اب بھی پاکستان سے دراندازی کی کوشش جاری ہے جسے آرمی مسلسل چوکسی اور ناقابل تسخیر حوصلے سے ناکام بنا رہے ہیں۔انہوں نے مزید کہا کہ پچھلے سال میں حفاظت اور استحکام کے تمام پیرامیٹرز میں بہت زیادہ بہتری آئی ہے۔ عسکریت پسندوں کا بائیکاٹ کر کے عوام نے یہ بھی بتا دیا ہے کہ یہاں علیحدگی پسندی اور گن کلچر کی کوئی جگہ نہیں۔ناردرن کمانڈ کے سربراہ نے کہا کہ ملک میں کورونا کی تیسری لہر کا اثر پھیل رہا ہے۔ پہلے کی طرح، شمالی کمان نے دونوں مرکز کے زیر انتظام علاقوں کی حکومتوں کے ساتھ مل کر لوگوں کی مدد میں پیش قدمی کی ہے۔ آرمی اس وبائی مرض کے خلاف پوری طرح عوام کے ساتھ ہے اور ان کی بے لوث خدمت کے لیے تیار ہے۔ مارچ 2020 سے اب تک فوج کے تمام ہیلتھ ورکرز اپنی جان کی پرواہ کیے بغیر ملک اور شہریوں کی خدمت میں مصروف ہیں۔
