امت نیوز ڈیسک //
سرینگر، 08 ستمبر :جموں و کشمیر حکومت نے قانون ساز اسمبلی کے اسپیکر کو ڈوڈہ کے رکن اسمبلی مہراج دین ملک کی پبلک سیفٹی ایکٹ (پی ایس اے) کے تحت حراست کے بارے میں مطلع کیا ہے۔
ڈپٹی کمشنر ڈوڈہ ہروندر سنگھ کی جانب سے جاری اطلاع، جس کی ایک کاپی نیوز ایجنسی کشمیر نیوز آبزرور (کے این او) کے پاس موجود ہے، کے مطابق ڈوڈہ-52 حلقے کی نمائندگی کرنے والے ملک کے خلاف جموں و کشمیر پبلک سیفٹی ایکٹ 1978 کے تحت کارروائی کی گئی ہے۔
مراسلے میں کہا گیا ہے کہ یہ اقدام ان کی ان سرگرمیوں کی بنیاد پر اٹھایا گیا جو “امنِ عامہ کے قیام کے خلاف” تصور کی گئی ہیں۔
اس میں مزید کہا گیا: “متعلقہ مواد، رپورٹس اور حالات کا جائزہ لینے کے بعد حکام اس نتیجے پر پہنچے کہ ان سرگرمیوں کا تسلسل ضلع میں امن، سکون اور عوامی نظم کے لیے ‘سنگین خطرہ’ ہے۔”
حکومت کا کہنا ہے کہ پی ایس اے کے تحت احتیاطی حراست کو “عوامی نظم کے تحفظ اور خطے میں قانون و امن قائم رکھنے کے مفاد میں ضروری” سمجھا گیا۔ —(کے این او)
