(سرینگر) پولیس نے حالیہ رنگریٹ سرینگرانکاونٹر کے بعد ملک مخالف سرگرمیوں کے الزام میں ماں اور بیٹی کو گرفتار کیا ہے۔ سرکاری ذرائع نے ایک مقامی خبر رساں ایجنسی کو بتایا کہ رنگریٹ مسلح تصادم کے بعد روز انکلیو راولپورہ سرینگر کی رہائشی مشتاق احمد صوفی کی بیوی افروزہ اور اس کی بیٹی عائشہ دختر مشتاق احمد صوفی نے ملک مخالف سرگرمیاں انجام دیں۔ ان کا کہنا تھا کہ دونوں کو تھانہ صدر کی پولیس نے گرفتار کیا تھا اور بعد میں قانونی کارروائیوں کو مکمل کرنے کے بعد انہیں ویمن پولیس اسٹیشن رام باغ منتقل کردیا گیا ۔ ایک پولیس اہلکار نے مذکورہ نیوز ایجنسی کو اس بات کی تصدیق کی کہ گرفتار ماں، بیٹی کے خلاف ایف آئی آر نمبر 209/2021 زیر دفعہ 147، 148، 149 اور 326 کے تحت سرینگر کے مضافات میں رنگریٹ میں فائرنگ کے نتیجے میں علاقے میں امن و امان میں خلل ڈالنے کی کوشش کرنے پر مقدمہ درج کیا گیا ہے۔ واضح رہے کہ پیر کو سرینگر کے رنگریٹ علاقے میں پلویس کے ساتھ ایک مختصر تصادم میں دو جنگجو مارے گئے تھے۔ فائرنگ کے تبادلے کے بعد قریبی علاقوں کے مقامی لوگوں نے احتجاج کیا اور سیکورٹی فورسز پر پتھراؤ کیا ۔ مقامی لوگ الزام لگارہے تھے کہ پولیس نے ایک فرضی تصادم میں دو مشتبہ عسکریت پسندوں کو ہلاک کیا۔
