(بانڈی پورہ) ضلع بانڈی پورہ کے حاجن علاقے سے تعلق رکھنے والے نوجوان صحافی سجاد گل کو پولیس نے گرفتار کیا ہے۔ اطلاعات کے مطابق سجاد گل نے حال ہی میں سرینگر کے شالیمار علاقے میں تصادم آرائی کے دوران مارے گئے عسکریت پسند سلیم پرے کے گھر والوں و رشتہ داروں کا ایک ویڈیو سوشل میڈیا پر پوسٹ کیا تھا جس میں وہ انڈیا مخالف نعرے بازی کررہے تھے۔ پولیس نے سجاد گل کو حراست میں لے لیا۔ واضح رہے سجاد گل ایک نوجوان صحافی ہیں جو سینٹرل یونیورسٹی آف کشمیر کے شعبہ صحافت کے طالب علم ہے۔ سجاد گل نے کئی مقامی میڈیا اداروں کے لئے کام کیا ہے اور وہ اس وقت ‘کشمیر والا’ نامی ایک مقامی میڈیا ادارے کے ساتھ ” ٹرینی رپورٹر” کی حیثیت سے وابستہ ہیں۔ سماجی رابطہ کی ویب سائٹ ٹویٹر پر ایک صحافی آکاش حسن نے ان کے اہل خانہ کا حوالہ دیتے ہوئے لکھا کہ سجاد گل کو متعدد دفعات کے تحت پولیس نے حراست میں لیا ہے۔ انہوں نے کہا کہ پولیس نے مبینہ طور پر ان پہ آئی پی سی کی 120B( مجرمانہ سازش کے لئے فریق بننا) اور دفعہ 153B (عوام کے لئے خوف یا خطرہ لاحق بننا) دفعات کے تحت گرفتار کیا گیا ہے۔ انہوں نے سجاد گل کے اہل خانہ کا حوالے دیتے ہوئے مزید کہا ہے کہ بدھ کو رات دس بجے فوج ان کو اپنے ساتھ لے گئی تاہم بعد میں پتہ چلا کہ سجاد کو سمبل پولیس تھانہ میں رکھا گیا ہے۔
