اننت ناگ//جنوبی ضلع اننت ناگ کے بجبہاڑہ علاقے میں جمعے کے روز مشتبہ ملی ٹینٹوں نے سپیشل پولیس آفیسر (ایس پی او) پر نزدیک سے گولیاں چلائیں جس وجہ سے وہ شدید طورپر زخمی ہوا اور اُس کو علاج ومعالجہ کی خاطر نزدیکی ہسپتال منتقل کیا گیا۔
کشمیر زون پولیس نے ایک ٹویٹ کر کے بتایا،”اننت ناگ کے بجبہاڑہ علاقے میں مسلح افراد نے پولیس/سی آر پی ایف کی مشترکہ ناکا پارٹی پر فائرنگ کی۔ اس واقعے میں ایک پولیس اہلکار زخمی ہوا جسے فوری طور پر علاج کے لیے اسپتال منتقل کیا گیا۔ علاقے کو گھیرے میں لے لیا گیا۔ تلاش آپریشن جاری ہےـ”۔
سرکاری ذرائع نے بتایا کہ اننت ناگ کے کیر کدل بجبہاڑہ کے نزدیک جمعے کے روز جنگجووں نے ایس پی او غلام قادر پر نزدیک سے گولیاں چلائیں جس وجہ سے وہ خون میں لت پت ہو کر نیچے گر پڑا۔
انہوں نے بتایا کہ آس پاس موجود لوگوں نے زخمی ایس پی او کو علاج ومعالجہ کی خاطر نزدیکی ہسپتال منتقل کیا جہاں پر اُس کی حالت تشویشناک بنی ہوئی ہے۔
معلوم ہوا ہے کہ سیکورٹی فورسز نے آس پا س علاقوں کو محاصرے میں لے کر حملہ آوروں کی بڑے پیمانے پر تلاش شروع کی ۔
بتادیں کہ پچھلے چوبیس گھنٹوں کے دوران جموں وکشمیر میں جنگجویانہ سرگرمیوں میں غیر معمولی اضافہ ہوا ہے جس کے پیش نظر جموں وکشمیر میں سیکورٹی فورسز کو مستعد رہنے کے احکامات صادر کئے گئے ہیں۔
