امت نیوز ڈیسک //
سرینگر : محکمہ اطلاعات و تعلقات عامہ جموں و کشمیر نے وادی کے تمام ضلعی اطلاعاتی افسران کو میڈیا شناخت کے غلط استعمال اور صحافیوں کی نقالی کے خلاف سخت اقدامات اٹھانے کی ہدایت جاری کی ہے۔
یہ ہدایت ڈائریکٹر اطلاعات کشمیر، جناب سید شہنواز بخاری ، کی جانب سے جاری کی گئی، جو مختلف محکموں، میڈیا اداروں اور عوامی نمائندوں کی جانب سے ان شکایات کے بعد سامنے آئی ہے جن میں غیر مجاز افراد خود کو صحافی ظاہر کرکے سرکاری اور نجی اداروں کے ساتھ بلیک میلنگ اور دھونس جیسے غیر قانونی کاموں میں ملوث پائے گئے۔
سرکیولر کے مطابق، ان جعلی صحافیوں نے میڈیا کے نام پر بلیک میلنگ، بھتہ خوری، سرکاری افسران کو ہراساں کرنے اور غیر تصدیق شدہ یا توہین آمیز مواد کی تشہیر جیسے اقدامات کیے ہیں۔ متعدد معاملات میں ایسے افراد گرفتار بھی کیے گئے ہیں، جو اس مسئلے کی سنگینی کو ظاہر کرتا ہے۔
ڈائریکٹر اطلاعات نے تمام ڈسٹرکٹ انفارمیشن افسران کو ہدایت دی ہے کہ وہ اپنے اضلاع میں کام کرنے والے تصدیق شدہ اور مجاز صحافیوں کی فہرست تیار کریں اور باقاعدگی سے اسے اپ ڈیٹ کریں۔ سرکاری بیانات، پریس ریلیز اور دعوت نامے صرف مستند صحافیوں تک محدود رکھے جائیں۔
مزید برآں، ڈسٹرکٹ انفارمیشن افسران کو ہدایت دی گئی ہے کہ میڈیا کارڈز کے غلط استعمال یا فرضی شناخت کے واقعات کی فوری طور پر نشاندہی کرکے متعلقہ ڈپٹی کمشنرز اور پولیس حکام کو مطلع کریں تاکہ قانونی و انتظامی کارروائی کی جاسکے۔
مقامی میڈیا ہاؤسز اور مدیران کو بھی کہا گیا ہے کہ وہ نمائندوں، فری لانسرز یا اسٹرنگرز کے تقرر کے وقت مکمل جانچ پڑتال کریں اور مستند شناختی کارڈ اور اجازت نامے جاری کریں۔ نیز، کسی بھی فرد کی جانب سے میڈیا ادارے کے نام کا غلط استعمال سامنے آنے پر اس سے کھلے عام لاتعلقی کا اظہار کریں اور پریس کونسل آف انڈیا اور DIPR کی ہدایات کے مطابق صحافتی اصولوں کی پاسداری یقینی بنائیں۔
محکمہ اطلاعات نے اس ہدایت میں کہا ہے کہ صحافتی معیار اور میڈیا اداروں پر عوامی اعتماد کو برقرار رکھنے کے لیے اجتماعی ذمہ داری نبھانا ہر فریق کی ذمہ داری ہے۔
