جموں//جموں پولیس نے تین منشیات فروشوں کو گرفتار کر کے ان کے قبضے سے 12 کلو گرام ہیروئن ضبط کی ہے، جس کی بین الاقوامی مارکیٹ میں قیمت تقریباً 24 کروڑ روپے ہے۔
پولیس نے دعویٰ کیا ہے کہ ان کے پاس سے تقریباً 11 لاکھ روپے نقدبھی برآمد ہوئے ہیں۔
ایڈیشنل ڈائریکٹر جنرل آف پولیس جموں مکیش سنگھ نے کہا کہ پولیس نے خفیہ اطلاع پر کاروائی کرتے ہوئے پولیس تھانہ باہو فورٹ کے دائرہ اختیار میں ایک خصوصی ناکا لگایا۔
انہوں نے کہا کہ ایک کار میں سفر کرنے والے تین مشتبہ افراد کو روک کر تلاشی لی گئی، ان سے منشیات اور نقدی برآمد ہوئی۔
مکیش سنگھ نے بتایا کہ اس معاملے میں ایف آئی آر درج کی گئی ہے اور تین ملزمان کو گرفتار کرلیا گیا ہے۔ گرفتار افراد کی شناخت سروان سنگھ، ملکیت سنگھ اور بلبیر سنگھ کے طور پر کی گئی، سبھی امرتسر کے رہنے والے ہیں۔
اے ڈی جی جموں نے کہا کہ جموں پولیس خطے میں منشیات کی سپلائی کے سلسلے کو جڑ سے اکھاڑ پھینکنے کے لیے انتھک محنت کر رہی ہے۔
