(سرینگر) سرینگر سمیت وادی کے تمام ضلع صدر مقامات پر یوم جمہوریہ کی مناسبت سے فُل ڈریس رہرسل کا اہتمام کیاگیا جبکہ انتظامیہ کے آفیسران نے ’ترنگا ‘لہرانے کے بعد مارچ پاسٹ پر سلامی لی۔ تفصیلات کے مطابق سرینگر اور وادی کے دوسرے ضلع مقامات پر 26جنوری کی تقریبات منانے کے سلسلے میں یہاں شیر کشمیر اسٹیڈیم سرینگر اور دوسرے ضلع صدر مقات اور تحصیل مقامات پر بھی فُل ڈریس رہرسل کا اہتمام کیا گیا۔ سرینگر میں منعقدہ تقریب کے موقعے پر صوبائی کمشنر کشمیرنے پرچم کشائی کی رسم انجام دی اور مارچ پاسٹ پر سلامی لی۔ اس تقریب میں آئی جی پی کشمیر شری وجے کمار( آئی پی ایس)اور دیگر پولیس و سیکورٹی فورس کے سینر آفیسران موجود تھے۔ تقریب میں جموں وکشمیر پولیس،آئی آر پی، سی آر پی ایف ،این سی سی ،فائر اینڈ ایمر جنسی سروسز ،فارسٹ پروٹکشن فورس،جے کے آکزلری پولیس نے حصہ لیا۔ تقریب میں 26جنوری کے سلسلے میں ترتیب دئے گئے تمام پروگراموں کا بھی جائزہ لیا گیا ۔اس موقعہ پر میڈیا سے بات کرتے ہوئے صوبائی کمشنر کشمیر پی کے پولے نے کہا کہ میں نے پریڈ کا معائنہ کیا اور یہ دیکھا کہ سیکورٹی فورسز تقریب کو خوش اسلوبی سے انجام دینے کیلئے تیار ہے ۔ انہوں نے کہا کہ کووڈ ایس او پیز پر مکمل طور پر عملدر آمد کے بیچ یوم جمہوریہ کی تقریب خوش اسلوبی کے ساتھ منعقد ہونگی ۔ 
وادی کے دوسرے ضلع صدر مقامات پر بھی یومِ آزادی منانے کے سلسلے میں فُل رہر سل کا بھی اہتمام کیا گیا۔جہاں پر تمام اضلاع کے ایڈیشنل ترقیاتی کمشنروں جبکہ کئی مقامات پر ریونیو آفیسران نے جھنڈا لہرا کر پریڈ پر سلامی لی۔اس موقعہ پر جموں وکشمیرپولیس کے سینئر حکام کے علاوہ نیم فوجی حکام بھی موجود تھے۔اس موقعہ پرایڈیشنل ترقیاتی کمشنر اننت ناگ نے پرچم لہرا کر پریڈ پر سلامی لی۔رہرسل کے موقعہ پر جے کے پولیس ،سی آر پی ایف، فائر اینڈ ایمرجنسی سروسز ،سیول ڈیفنس نے مارچ پاسٹ میں حصہ لیا۔ضلع کولگام میں بھی گورنمنٹ ڈگری کالج میں فُل ڈریس رہرسل کا بھی اہتمام کیا گیا۔اس موقعہ پر جموں وکشمیر پولیس،سی آر پی ایف،جے کے آرمڈ پولیس ،ہوم گارڈکے دستوں نے مارچ پاسٹ میں حصہ لیا۔پلوامہ میں بھی ڈسڑکٹ پولیس لائنز میں فُل ڈریس رہرسل کا اہتمام کیا گیا ۔جہاں ضلع ایڈیشنل ترقیاتی کمشنر پلومہ نے جھنڈا لہرا کر پریڈ پر سلامی لی۔اس موقعہ پر جموں کشمیر پولیس ،سی آر پی ایف،فائر اینڈ ایمرجنسی سروسز کے دستوں نے مارچ پاسٹ میں حصہ لیا۔اسی طرح ضلع شوپیاں میں سپورٹس سٹیڈیم میںتقریب منعقد ہوئی وادی کے شمالی اضلاع میں بھی 26 جنوری منانے کے سلسلے میں فُل ڈریس رہر سل کا انعقاد کیا گیا ۔اس سلسلے میں ضلع بارہمولہ میں بھی ایک فُل ڈریس رہر سل کا اہتمام کیا گیا۔اور ترتیب دئے گئے تمام پروگراموں کا مشاہدہ کیا گیاجبکہ دیگر اضلاع کے ساتھ ساتھ گاندربل میں بھی تقریبات منعقد ہوئی ۔(انفو)
