(سرینگر) پولیس نے دو بیٹوں کو اپنے باپ کا قتل کرنے اور اس کی لاش کو ڈل جھیل میں پھینکنے کے الزام میں گرفتار کر لیا ہے۔ ایک بیان میں پولیس ترجمان نے کہا کہ رواں ماں کی 7تاریخ کو ایک مصدقہ اطلاع پر کہ اخون محلہ فارشور روڈ کے قریب ڈل جھیل میں ایک نامعلوم نعش برآمد کی گئی ، پولیس تھانہ نگین نے کارروائی کرتے ہوئے لاش کو باہر نکالا، اور اسے طبی قانونی کارروائیوں کے لیے ہسپتال منتقل کر دیا۔اس کے بعد سیکشن 174 سی آر پی سی کے تحت تفتیش کی کارروائی شروع کی گئی۔نعش کی شناخت خورشید احمد ولد غلام نبی سکنہ الٰہی باغ عمر تقریباً 62 سال کے بطور ہوئی ۔طبی عملے کے بعد لاش ورثاءکے حوالے کر دی گئی۔ ابتدائی میڈیکل رپورٹ میں گردن وغیرہ پر نشانات کا انکشاف ہوا ہے۔اس کے علاوہ دیگر مشکوک حالات کی تفتیش سے یہ بات سامنے آئی کہ متوفی کو نامعلوم افراد نے قتل کیا ہے جنہوں نے لاش کو ڈل جھیل میں پھینک دیا۔ اس کے مطابق مقدمہ ایف آئی آر نمبر34/2022 زیر دفعہ 302، 120 بی آئی پی سی، 201 آئی پی سی تھانہ نگین میں درج کر کے تفتیش شروع کی گئی۔شواہد، زبانی گواہوں، سی سی ٹی وی اور تکنیکی تجزیے سے یہ بات سامنے آئی کہ متوفی کو اس کے گھر والوں نے 5 اپریل کی شام کچھ جھگڑے کے بعد ان کے گھر پر قتل کر دیا اور لاش کو دن بھر گھر میں رکھا۔ 6 اپریل کی شام، مناسب منصوبہ بندی کے بعد، انہوں نے لاش کو ایک آئی20 گاڑی میں منتقل کیا اور جرم کو چھپانے کے لیے اسے ڈل جھیل میں پھینک دیا۔مقتول کے دونوں بیٹوں کو گرفتار کر کے گاڑی کو قبضے میں لے لیا گیا ہے۔ مزید تفتیش اور گرفتاریاں عمل میں لائی جائیں گی۔
