(بانڈی پورہ) بانڈی پورہ ضلع کے سریندر جنگلاتی علاقے میں بدھ کو فورسز اور جنگجوؤں کے درمیان جاری تصادم میں ایک جنگجو مارا گیا ہے۔کشمیر زون پولیس نے آئی جی پی کشمیر کا حوالے دے کر ایک ٹویٹ کر کے بتایا،”بانڈی پورہ تصادم میں ایک جنگجو مارا گیا ہے، جس کے قبضے سے ایک اے کے رائفل، 3میگزین برآمد کئے گئے ہیں۔ مارا گیا جنگجو نئے درانداز عسکری گروپ کا حصہ تھا۔علاقے میں دیگر جنگجوئوں کی تلاش جاری ہے”۔ مارے گئے جنگجو کی شناخت وسن پٹن بارہمولہ کے گلزار احمد گنائی کے بطور ہوئی ہے، پولیس کا کہنا ہے کہ وہ 2018 میں سرحد کے اُس پار گئے تھے اور 6 ماہ قبل ہی دراندازی کرکے واپس آگئے تھے. واضح رہے اس سے قبل فورسز کو جنگلی علاقے میں دو سے تین ملی ٹینٹوں کی موجودگی کی اطلاع موصول ہوئی ہے. آخری اطلاعات موصول ہونے تک جنگل میں گولیوں کا تبادلہ جاری تھا۔
