امت نیوز ڈیسک //
جموں: دفعہ370 کی منسوخی کے بعد مرکزی سرکار نے ایک مشق شروع کی ہے جس کے تحت ڈبلیو پی آر کو 46,666 کنال اراضی پر ملکیتی حقوق دیئے جائیں گے جو انہیں دفعہ 370 کی منسوخی سے پہلے الاٹ کی گئی تھی۔ یہ اراضی 1954 میں ویسٹ پاکستانی ریفیوجیز (ڈبلیو پی آرز) کو اس وقت الاٹ کی گئی جب انہوں نے بین الاقوامی سرحد پار کرکے پاکستان سے بھارت آکر جموں میں آباد ہوئے تھے۔
مرکز میں اقتدار میں آنے کے بعد بی جے پی سرکار نے مغربی پاکستان اور پاکستان کے زیر قبضہ جموں و کشمیر (POJK) کے پناہ گزینوں کو معاوضہ کے طور پر 5.5 لاکھ روپے فی خاندان بھی دیا تھا۔دفعہ 370 کے خاتمے کے بعد مغربی پاکستان کے پناہ گزینوں، POJK پناہ گزینوں، گورکھاز اور والمیکی سجام سے وابستہ افراد کو جموں و کشمیر کے ڈومیسائل قرار دیا گیا تھا۔
ان پناہ گزینوں کو جس اراضی پر ملکیتی حقوق دیئے جائیں گے وہ جموں ضلع کے اکھنور، آر ایس پورہ، بشنہ، ضلع سانبہ اور ہیرا نگر اضلاع کے کچھ حصوں میں موجود ہیں۔
